LAOAG CITY – Inrakurak ti Israeli military a rinugyan da manen ti ground operation kontra iti Hamas iti Bureij refugee camp ken iti daya a paset iti ili ti Deir al-Balah iti central Gaza Strip.
Inpaganetget ti Israel Defense Forces a ti target ti ipatpatungpal da nga air strikes ket dagiti terorista ken pagnanaedan da nga imprastraktura.
Mainaig iti daytoy, kinumpirmaran ti charity Médecins Sans Frontières nga addan ti 70 a tattao a natay idinto a 300 a sabsabali dagiti nasugatan a kaadoan kadagitoy ket babbai ken ubbing ti naikabil iti ospital iti Deir al-Balah sipud laeng idi Martes, Hunyo 4 ita a tawen.
Napasamak daytoy kalpasan ti panagkikita dagiti mediators iti Estados Unidos, Egypt ken Qatar idiay Doha ken Cairo tapno pagsasaritaan da no kasanu nga ipinal ti baro a ceasefire ken ti katulagan para iti pannakawaya-wayan dagiti nabatbati pay nga hostage ti Hamas.
Maipalagip nga umaboten iti 36,580 a tattao ti natay idiay Gaza sipud nangrugi ti gubat iti nagbaetan ti Israeli Forces ken Hamas idi Oktubre 7, 2023.
