LAOAG CITY – Pilaan ti Philippine National Police ti reklamo a panaglabsing iti Republic Act 9165 babaen ti regular filing ti subject ti buy-bust operation iti ciudad ti Batac.
Nabigbig ti subject ti operasyon a ni Fer Joshua Quilates y Pangdan, agtawen ti 30, naasawaan, drug surrenderer, ken residente iti Brgy. 13 Baay iti nasao a ciudad.
Segun ken ni Police Lt.Col. Adrian Gayuchan,ti chief of police iti ciudad ti Batac, immuna a kinatransaksyon ni Quilates ti nagpammarang a police poseur buyer, ngem idi naamoan na a pulis daytoy ket dagus a nagtalapwagaw babaen ti panaglugan na iti gray Isuzu Fuego pick-up nga addaan ti plate number a WGL 938 a nagturong iti Brgy. Dariwdiw iti nasao a ciudad.
Kinamat dagiti otoridad ti suspek agingga a nakadanun da iti sitio Casalamagian, Brgy. Nagbacalan iti ciudad ti Batac ken ditoy a nakita da iti tengnga ti taltalon ti nagluganan ni Quilates, ngem awanen ti nasao a suspek.
Iti panangsukimat dagiti otoridad iti nagluganan ti suspek ket nakakumpiskar da ti 12 a pedaso ti heat sealed transparent plastic sachet a naglaon ti maipagarop a shabu, maysa a black pouch, dua a pedaso a glass tubes, maysa a black lighter, maysa nga empty self-sealing transparent plastic, dua a pedaso ti crumpled aluminum foil, ken tallo a pedaso ti rolled aluminum foils.
Mapatta-patta a dagiti nakumpiskar nga ebidensya ket agdagsen iti agarop dua a gramo ken agbalor ti P13, 600 a pisos.
Inbatad ni Gayuchan nga agpapan ita ket saan da pay a masinunuo ti lokasyon ti nasao a suspek.
