LAOAG CITY – Iti umuna a gundaway ita a 2024 NBA Finals ket tinambakan ti Dallas Mavericks ti karibalna a Boston Celtics.

Inabak ti Mavericks ti Boston tapno ibulsa ti Game 4 ken puersaen ti Game 5.

Nagbalin a dominante ti ay-ayam ti Dallas iti panangrugi pay laeng ti ay-ayam ken dagus a nagaramid ti 34 big points maidasig iti 21 points a sungbat ti Boston.

Nanayunan pay ti lamang ti Dallas iti 2nd quarter idi iserrek ti 27 points idinto a nalimitaran ti Boston iti 14 points.

Iti panaglippas ti 2nd quarter wenno first half ket iggemen ti Dallas ti 26 points a lamang, 61 – 35.

Iti umuna nga half, naaramid ni Luka a mangiserrek ti 25 points idinto nga 11 points met ti naaramid ni Kyrie Irving. Para iti Boston, arig ket binaklay ni Jayson Tatum iti intero a grupo babaen iti 15 points idinto a nalimitaran iti 8 points ti ka-tandem a ni Jaylen Brown.

Iti panagserrek ti 3rd quarter, dandanin a dumanonen iti 40 points ti lamang ti Dallas agingga idi aginanan da Luka Doncic, Kyrie Irving ken dadduma pay nga starter, maysa a minuto sakbay a naglippas.

Naglippas ti laban iti nagbaetan dagiti dua iti iskor a 122 – 84.

Iti uneg ti 33 a minuto laeng a panagay-ayam ket naaramid ni Luka Magic a makagun-od ti 29 points idinto a 21 points met nagbalin nga ambag ni Kyrie a nagay-ayam laeng ti 31 a minuto.

Nadagsen a double-double ti inpakita ni Dereck Lively II a nagaramid ti 11 points, 12 rebounds iti uneg laeng ti 22 a minuto a panagay-ayam.

Para iti Boston, ti 15 points ni Jayson Tatum laeng ti kadakkelan nga individual points.

Agsubli met iti TD Garden ti Game 5 iti nagbaetan dagiti dua a team no sadino ket iggem pay laeng ti Boston ti lead, iti iskor a 3 – 1.