LAOAG CITY – Nagballigi ti Strong Group Athletics-Pilipinas iti 43rd William Jones Cup.
Nangabak ti Pilipinas kontra iti Chinese Taipei-A iti babaen ti overtime 83-79.
Iti last quarter ket naiserrek ni Kiefer Ravena ti three-points iti nabatbati a 13.2 seconds tapno maalada ti 73-71 a lamang ngem saan nga inpalubos ti Chinese Taipei ket naiserrek ti bola iti babaen ni Brandon Gilbeck iti 7.6 segundo ken dimmanon iti overtime ti ay-ayam.
Naammoan nga apaman a simrek ti overtime ket nagbalin a naiget ti panagsinnukat ti depensa agingga a nangabak ti Pilipinas iti ay-ayam.
Daytoy ti umuna a titulo ti Strong Group idi nag-first runner up-da iti Dubai International Championship kalpasan a napaayda iti Al Riyad iti final.
Napadayawan kas Most Valuable Player ken karaman iti Mythical Five ni Chris McCullough a nakairekord met ti 12 points.
Indauluan iti panangabak ti SGA ni DJ Fenner nga addaan ti 15 points, siam n rebounds ken uppat nga steals idinto a ni RJ Abarrientos ket addaan ti 14 points.
Kabayatanna, ti Strong Group ket isu ti maikapito a koponan iti Pilipinas a nagballigi ti Jones Cup a ti naudi a kampeonato ket idi 2019 a nagun-od ti Mighty Sports.
