LAOAG CITY – Naiyuswat ti public consultation seknan ti pannakaipalawa ti Laoag International Airport (LIA) nga inatedaran dagiti residente nga adda maapektaran a lote na, Department of Transportation (DOTr), Metro Ilocos Norte Council (MINC) ken ti Provincial Assessor.
Daytoy ti inbatad ni Atty. Nikki Pillar, mangidadaulo ti Metro Ilocos Norte Council.
Segun ken ni Pillar kabayatan ti public consultation ket naruay dagiti suludsod dagiti private lot owners, kangrunaan na no apay a maala dagiti lote da.
Kuna ni Pillar, kalpasan a nailawlawag kadakuada daytoy a banag ket naawatanda ken inkarida a rugiandan nga iproseso dagiti kasapulan a requirements ita a lawas para iti pannaka-ilako ti lote da.
Inpasingked ni Pillar a nakasagana metten ti tseke a maibayad kadagiti masekanan a private lot owners.
Ipanamnama ni Pillar a mabayadan amin ti lote dagiti apektado para iti pannakapalawa ti nasao nga eropuerto sakbay nga agngudo ita a tawen.
Immunan nga inbatad ni Pillar nga inbilin ni Governor Matthew Marcos Manotoc ti pannakaprotihir dagiti ti private lots ditoy probinsya.
