LAOAG CITY – Ado latta ti masalsalamaan dagiti kameng ti Provincial Veterinary Office ken Philippine National Police nga agir-iruwar ti baboy ditoy probinsya.
Daytoy ti inrakurak ti Provincial Veterinarian a ni Dr. Loida Valenzuela.
Kuna na nga ado latta dagiti makailibas nga agiruwar ti baboy manipod ditoy probinsya gapu ta ado dagiti alternatibo a pagruwaran kas iti ili ti Pagudpud, Nueva Era, Solsona ken Badoc.
Inpalgak ni Valenzuela a makaapektar daytoy iti supply ti baboy ditoy probinsya no sadinno nga adda pay dagiti manggundaway a mangipangato ti presyo dagiti karne ti baboy, banag nga ibilang ti provincial veterinarian a saan a nainkalintegan.
Innayon na a no adda dagiti makumpiskar da a baboy a saan a masinunuo ti naggapwan na gapu ta awan ti umiso a dokumento da ket kapilitan nga ikali da a dagus.
