LAOAG CITY – Pormalen a binigbig ti Guinness World Records ti Prime Timers, maysa a British choir a bukbuklen ti 17 a miembro nga addaan ti average nga agtawen ti 94, kas kataengan a choir iti intero a lubong.
Ti Prime Timers ket addaan ti miembro nga agtawen ti 87 agingga iti 99 ken naaddaanda ti Christmas concert idi Disiembre 19, 2024 iti Grand Ballroom ti Crowne Plaza Hotel idiay U.K.
Iti sango ti opisial manipud iti Guinness World Records, pinadayawan isuda ti world record kalpasan ti concert-da.
Naammoan a dagiti miembro ti choir ket agpapada a residente ti pito a care homes nga imatmatonan ti Runwood Homes a nakabase iti Stratford-Upon-Avon.
Malaksid kadagiti tawenda, naalada ti rikna dagiti agbuybuya iti dedikasion ken talentoda.
Nag-perform pay ti nalatak a singer a ni Tony Christie a nakipaset iti Prime Timers para kadagiti kanta nga “Amarillo” ken “Silent Night,” a nangnayon ti kinaragsak ken inspirasion iti rabii ti konsierto.
Napateg a pammalagip ti balligi ti Prime Timers a ti musika ket awan ti pilpilienda a tawen ken ti talento ket mabalin a dumur-as iti aniaman a yugto ti biag.
