LAOAG CITY – Uppat a tattao ti natay kalpasan a bimmagsak ti bassit nga eroplano iti Maguindanao del Sur.
Kinumpirmaran ni U.S. Embassy spokesperson Kanishka Gangopadhyay a maysa nga American military-contracted aircraft ti bimmagsak iti Barangay Malatimon, Ampatuan.
Saan metten a nangipaay ti dadduma pay a detalye a pakairamanan ti pakabigbigan dagiti biktima.
Basar kadagiti residente iti lugar, nakita da nga agas-asok ti eroplano iti tangatang sakbay a naan-anay a bimmagsak.
Nairaman pay iti insidente ti maysa a nuang a nakaiwarwar iti taltalon a nagdisoan ti eroplano.
Agtultuloy ti imbestigasyon dagiti otoridad no ania iti makaigapu iti nasao nga insidente.
