LAOAG CITY – Nagballigi dagiti kameng ti Philippine National Police a nangarestar iti maysa a delivery truck driver iti naisayangkat nga Anti-illegal Drug Buy-bust operation iti paset ti Sitio Turod iti Barangay Tangaoan iti ili ti Piddig.
Nabigbig ti subject ti operasyon a ni Mr. Gilbert Domingo Ramos, agtawen ti 47, naasawaan, residente metlaeng iti nadakamat a barangay ken agpapaay iti maysa a Construction Supply iti ili ti Piddig.
Basar kadagiti otoridad, naglako ni Ramos ti maysa a sachet a naglaon ti maatap a shabu iti nagpammarang a police poseur-buyer.
Nakumpiskar pay manipod iti subject ti operasyon ti maysa a sachet a naglaon ti maatap a shabu, sangaribo a pisos a buy-bust money, ken ti maysa a pakete ti sigarilyo a naglaon ti 9 a sachet a naglaon ti maipagarop a shabu nga agdagsen ti nasurok a maysa a gramo ken mapatta-patta nga agbalor iti nasurok a walo ribo a pisos.
Ni Ramos ket maibilang kas Street Level Individual iti Drug Watchlist iti Philippine National Police.
Iti agdama ket nagtalinaed ni Ramos iti Philippine National Police iti ili ti Piddig ken manamnama a sumango iti kaso a panaglabsing iti Republic Act 9165 wenno Comprehensive Dangerous Drugs Act of 2002.
