LAOAG CITY – Maysa a lalaki idiay Estados Unidos nga agnagan ti Evans ti nakigtot idi naammoanna a pudno a diamond wenno diamante ti napidotna iti Crater of Diamonds State Park kalpasan nga inpagarupna nga ariduma laeng daytoy.
Basar iti Arkansas Department of Parks, Heritage and Tourism, umuna a daras a bimmisita ni Evans iti state park ken sangapulo a minuto pay laeng dagitoy a magmagna idi nakapidot ti inpagarupna nga ariduma a sukog pyramid.
Ti Crater of Diamonds State Park ket maysa nga state park a dati a pagminasan ti diamonds. Daytoy laeng ti diamond-bearing site iti intero a lubong a nakalukat para iti publiko ken no dadduma ket adda dagiti turista ti makapidpidot ti diamond.
Kalpasan a naiyawidna ti ariduma, ginutigot ni Evans ti anakna nga ipasukimat ti ariduma iti Gemological Institute of America. Kalpasan ti sumagmamano a lawas, nakumpirmaran a ti ariduma ket 4.87 carat a diamond.
Inparehistro ni Evans ti napidot a diamond iti state park ken inawaganna nga “Evans Diamond.”
Iti agdama, saan pay a nalawag no ilako ni Evans ti diamond-na wenno idulinna laeng daytoy.
