LAOAG CITY – Ibilang ni Ms. Tricia Pedro ti akinkukua ti maysa a coffee and bubble tea a saanna a kakompetensia dagiti padana nga aglaklako.
Segun kenkuana, agpapada dagitoy a patas nga agbirbirok para iti inaldaw-aldaw a panagbiagda isu a masapol laeng a ti negosio ket saan a pagbalinen a kompetensia.
Inbatadna a saan a gapu ta adda dagiti aldaw a nakapsot ti panaglakoda ket agaramidda ti wagas tapno maagaw ti kustomer ti sabali imbes ket tulunganda iti tunggal maysa tapno adda ti mapastrekda sakbay nga agngudo ti maysa nga aldaw.
Kunana a napintas ti sumrek iti negosio gapu ta saan nga umanay no mangnamnama laeng iti maaw-awat a sueldo.
Nupay kasta, inlawlawagna nga amin a rugi ket narigat ngem babaen ti anos, gaget ken gagar iti panagtrabaho ket awan ti imposible iti pananggun-od ti arapaap iti biag.
Innayonna a malaksid daytoy a negosio ket adda pay ti dadduma a pakakumikomanna kas ti printing shop ken panaglako ti pandesal.
