LAOAG CITY – Dumalan iti proseso dagiti maatap nga agaramid ti anomalya nga opisial ti gobierno ditoy Pilipinas.
Daytoy ti inpakaammo ni Ms. Chariz Garma, mangidadaulo ti Department of the Interior and Local Goverment ditoy siudad ti Laoag.
Segun ken ni Garma, no bilang adda dagiti mai-report a maipagarup nga agar-aramid ti anomalya nga opisial ti gobierno ket dumalanda iti umiso a proseso tapno matratar ken maadal dagiti kaso a maipataw kadakuada.
Nupay kasta, inlawlawagna a ditoy siudad ket awan ti report a maipadpadanon iti opisinada maipanggep kadagiti anomalya dagiti opisial.
Maipalagip nga immunan a trinatar ti House of Representatives iti pannakaidasar ti maysa a lungalong maipanggep iti pannakaipataw ti pannusa a firing squad iti maysa nga opisial a mapaneknekan nga adda ti inaramidna nga anomalya wenno adda ti pakainaiganna iti panagkunniber.
