LAOAG CITY – Pabor ni ACT-CIS Rep. Erwin Tulfo nga ikkan ti Suggested Retail Price wenno SRP dagiti taraon a kanayon a ngumatngato ti presiona tapno maliklikan ti panaggundaway dagiti sumagmamano a negosiante.
Inbatad ni Cong. Tulfo, gungundawayan dagiti sumagmamano a negosiante kas kadagiti middleman wenno dagiti broker ti presio dagiti sumagmamano a taraon a mangitunda ti panagngato ti presio daytoy kadagiti tiendaan.
Inpetteng ti agpanpanday linteg nga ikkan ti Department of Agriculture ti Suggested Retail Price dagiti taraon a kanayon a ngumingina ti presiona kas ti bagas, karne ti manok ken baboy, ikan, nateng ken dadduma pay.
