LAOAG CITY – Natay ti maysa a mannalon kalpasan a tinagtagbat ti padana met laeng a mannalon iti Barangay Saguigui iti ili ti Pagudpud.
Segun ken ni P/Maj. Carlo Abing, Hepe ti Pagudpud Municipal Police Station, ti biktima ket adda ti umno a tawen, awanan asawa, agdama a residente ti Barangay Saguigui iti ili ti Pagudpud ngem tubo iti Pudtol, Apayao.
Inbatadna a ti suspek ket adda ti umno a tawen, naasawaan ken residente iti nasao met laeng a lugar.
Inlawlawagna a basar iti inwayatda nga imbestigasion, kabayatan nga agiinom ti biktima ken ti dua a kakaduana iti maysa a kubo-kubo ket simmangpet ti suspek agingga nga adda ti nagbalin a nabara nga argumento dagitoy.
Gapu iti daytoy, natagbat ti biktima iti ima ken akinkannigid a paset ti tengngedna a nangitunda ti pannakatayna.
Naideklarar a pimmusayen ti biktima sakbay pay a nakadanon iti ospital babaen iti attending physician a ni Dra. Janice Zapanta.
Naitaray met ti suspek iti Bangui District Hospital ngem naiyakar iti Mariano Marcos Memorial Hospital and Medical Center iti siudad ti Batac para iti naan-anay a pannakatamingna.
Naammoan a ti rumrummuar a rason iti panagtinnagbat dagiti dua a mannalon ket gapu iti bingay ti kayo kadagiti naglabas a bagyo.
Kabayatanna, adda ti sumurok-kumurang tallo a kilometro ti kaadayona manipud iti barangay road ti nakapasamakan ti insidente.
