LAOAG CITY – Manamnama iti pannakaipaay ti lokal a gobierno ti Laoag City ti uppat a solar mobile water pump kadagiti mannalon iti uneg daytoy a tawen, kas paset ti panangmodernisa ken panangsuporta iti sektor ti agrikultura.
Segun ken ni Laoag City Mayor James Bryan Alcid, adda dagiti kiddaw dagiti mannalon iti pannakaipaay pay ti nayon a water pump, nangruna kadagiti lugar a saan a madanonan ti suplay ti danum kadagiti dadduma a pagmulaan.
Kunana nga adda dagiti lugar a kasapulan pay ti nayon a pasilidad tapno umdas ti danum a makaabot kadagiti pagmulaan kas iti Darayday ken Cataban.
Inbatad ni Mayor Alcid a ti solar mobile water pump ket maysa kadagiti baro a suporta a mangipaay iti danum kadagiti pagmulaan a saan a makadanon ti suplay ti danum.
Innayonna nga inton sumaruno a tawen, itultuloy ti lokal a gobierno ti plano a panangmodernisa ken panangpapigsa iti sektor ti agrikultura ken fisheries iti siudad.
Mainaig iti daytoy, inpakaammo ti mayor a nakitaripnong ti lokal a gobierno kadagiti 43 a grupo dagiti mannalon tapno maamoan dagiti kangrunaan a kasapulanda ken maibagada no ania dagiti suporta a mabalin nga ipaay ti siudad.
Malaksid iti daytoy, maipapan iti suplay ti danum kadagiti barangay, inbatad ni Mayor Alcid a nakitaripnong ti lokal a gobierno iti Ilocos Norte Water District wenno INWD tapno maamoan ti kasasaad ti suplay, nangruna kadagiti lugar a saan pay a makadanon ti umdas a danum.
Inpakaammona nga adda naikeddeng a target ti Ilocos Norte Water District a barangay a papigsaenda ti suplay ti danum ken ma-monitor daytoy iti tunggal tallo a bulan.
Kabayatanna, inbatad ni Mayor Alcid a kalikagum ti lokal a gobierno a maamoan no ania dagiti proyekto a nalpasen ken no epektibo dagitoy, tapno saan laeng a para iti compliance ti pannaka-install dagiti pasilidad no di ket pudno a makadanon ti danum kadagiti umili ken mannalon iti siudad.
