LAOAG CITY – Nakipagpartisipar ti lokal a gobierno ditoy siudad ti Laoag iti International Climate Action.
Segun ken ni Laoag City Mayor James Bryan Alcid, maysa kadagiti prayoridadna ditoy siudad ket ti agtultuloy a pannakadalus iti aglawlaw.
Gapu iti daytoy, nakipagpaset iti Coastal Clean-up and Coconut Planting iti lokal a gobierno ditoy siudad ti Laoag iti Barangay 35 Gabu-Sur ditoy siudad.
Patienna a ti nadalus nga aglawlaw ket ad-adda a maipasigurado ti salun-at dagiti umili ken maallukoy dagiti bisita nga umay mangkita ti naidumduma a kinapintas ti siudad.
Pagyamananna nga adda dagitoy nga aktibidad tapno mapalagipan dagiti tunggal residente ti importansia ti panagdalus iti aglawlaw.
Kabayatanna, innayon ni Mayor Alcid ti agtultuloy a panagkaykaysa ti lokal a gobierno tapno masigurado a ti siudad ket maysa kadagiti kadalusan a pagnaedan iti intero a pagilian.
