Inbatad ni Ms. Elma Gabriel, ti mangidadaulo iti Micro, Small, and Medium Enterprises Office (MSMEO) iti kapitolyo probinsyal a maysa kadagiti sumaruno nga aktibidad ti probinsia ket ti pannakipaset ti gobierno probinsyal iti Credit Surety Fund.
Ti Credit Surety Fund (CSF) ket maysa a programa iti Pilipinas a mangpapigsa iti posibilidad a makaala iti pautang dagiti micro, small, and medium-sized enterprises (MSMEs) ken dagiti kooperatiba manipud kadagiti bangko.
Inlawlawag na a daytoy ket paset ti pagtitinnulong ti gobierno probinsyal ken dagiti bangko ken dagiti accredited a lokal a kooperatiba iti probinsia, tapno maipasdek ti Credit Surety Fund tapno adda ti pagutangan dagiti Small and Medium Enterprises (SMEs).
Segun ken ni Ms. Gabriel, dagiti Small and Medium Enterprises a kayat na ti umutang ket mabalin nga agaplikar kadagiti accredited a kooperatiba iti Credit Surety Fund.
Innayon na a gagem ti nasao a programa a maikkan ti naan-anay nga oportunidad dagiti Small and Medium Enterprises a makagun-od iti kasapulan da a pondo tapno ad-adda pay a mapasayaat ken mapadur-as da ti negosyo da.
