LAOAG CITY – Inbalakad ti maysa nga eksperto a no makapaspasar ti anxiety attack ket masapol nga ikarigatan a maaddaan ti healthier lifestyle.
Segun iti Internal medicine-mental health ken adult cardiology a ni Dr. Vincent Manuel, napateg a maaddaan ti usto a pannaturog a rumbeng a pito agingga iti siyam nga oras iti kada rabii.
Kunana a kasapulan pay a liklikan ti bisyo kas ti panagsigarilyo ken panaginom ti arak.
Innayon na a kasayaatan no in-inot a sangwen wenno i-overcome ti maysa a tao ti agserserbi a “trigger” wenno rason ti anxiety na gapu ta no agtultuloy daytoy ket agbalin a lifetime cycle daytoy a mabalin a kumaro pay.
Mainaig iti daytoy, kuna ti doktor a nupay agduduma ti coping mechanism ket kapatga nga adda ti makasarsarita kas iti nagannak ken dagiti nasinged iti biag a masigurado a mapagtalkan.
Inbalakad pay ni Dr. Manuel a maysa pay a kapatgan nga aramiden ket ti panagpacheck-up iti espesyalista tapno maipaayan ti usto nga agas para kadagiti kastoy a kondisyon.
