LAOAG CITY – Nakabkabil ti maysa a lalaki nga adda ti rangkap ti bagina iti Barangay Naguillan iti ili ti Nueva Era.
Segun ken ni P/Capt. William Sotelo, Hepe ti Nueva Era Municipal Police Station, ti biktima ket adda ti umno a tawen, umel, mannalon ken residente iti Barangay Bugasi iti ili ti Banna idinto a dagiti suspek ket maysa a lalaki, adda ti umno a tawen ken residente iti ili ti Nueva Era ken ti kaduada a kinainumanda.
Inbatadna a basar iti inwayatda nga imbestigasion, napan nakigapas iti taltalon ti biktima iti pagayamna iti nasao nga ili.
Inlawlawagna nga apaman a nalpas a naggapas dagitoy ket nagiinumda pakairamanan ti maysa pay a kaduada agingga nga adda ti saanda a nagkinnaawatan a nangitunda iti panagririda.
Gapu iti daytoy, inpakaammo ni P/Capt. Sotelo a kinabkabil ti dua a suspek ti biktima no sadinno a nagsagaba ti sugat iti ulo ti biktima nga insigida met a naitaray iti kaasitgan nga ospital ngem nakaruar met laeng daytoy.
Innayonna a manamnama nga agsarita dagiti tallo nga indibidual ita nga aldaw.
