LAOAG CITY – Inbutaktak ni Vice President Sara Duterte a sarunwen na ti ama na a ni dati a Presidente Rodrigo Duterte iti The Netherlands a nangikabilan kenkuana ti International Criminal Court.
Inbatad na nga addan ti katulagan a kasapulan a kasarita na dagiti abogado na sadinno man ti pangikabilan da iti ama na.
Kuna na a napateg a makasarita na dagiti abogado iti The Netherlands no ania ti sumaruno da nga aramiden.
Binalakadan na met ti ama na a saan nga agawat ti aniaman a makan wenno danom a maididiaya kenkuana.
Immunan a naarestar ni Duterte iti Ninoy Aquino International Airport apaman a simmangpet iti Pilipinas manipod idiay Hong Kong ken naikabil iti Villamor Airbase para iti pannakaeksamen ti salun-at na.
Sakupen ti imbestigasyon ti International Criminal Court dagiti maipagarop a krimen nga adda ti pakainaigan iti kampanya kontra iti illegal a droga ni Duterte sipud idi Nobyembre 2011 agingga iti Marso 2019, sakbay nga opisyal a nagikkat ti Pilipinas iti International Criminal Court.
