LAOAG CITY – Naisayangkat ti public hearing mainaig ti kalikagum a maipangato ti minimum wage ditoy rehiyon uno nga indauloan ti Department of Labor and Employment Region 1 Director Honorina Dian Baga.
Segun kenni Director Baga, inimbitaranda dagiti business owners tapnu mangegan ti takderda seknan iti daytoy a lungalong no masapol kadin a ngumato ti minimum wage.
Kinunana a masapol a mabalanse daytoy para kadagiti business owners ken dagiti mangmangged.
Inlawlawagna a kalpasan iti daytoy ket tingitingenda a nasayaat dagiti naala nga impormasion ken datos kadagiti nakipagpartisipar iti nasao a public hearing. Innayonna a sakbayda a rugianan ti panagsasarita iti board ket adda ti maudi a public hearing idiay La union intono aldaw ti Lunes.
