LAOAG CITY – Nauram ti atep ti maysa a paglakoan ti furniture iti Barangay Bengcag ditoy siudad ti Laoag.
Segun ken ni Barangay Chairman Jayson Ponce, ti Barangay Araniw ditoy siudad ti Laoag, nairana a dimmalyasatda iti lugar isu nga insigida a nagsardengda ken timmawag iti Bureau of Fire Protection tapno ipakaammo ti nasao nga uram.
Inbatadna a kabayatan nga iyur-urayda dagiti bumbero ket nagtitinnulongda nga iruar dagiti ilaklako dagiti maseknan a rattan.
Kunana nga alisto a nagramram ti apoy gapu ta labig ti nauram a nangitunda ti napuskol nga asok.
Inlawlawagna a nagpaut iti agarup 15 a minuto ti napasamak nga uram sakbay a naideklarar a fire out.
Naammoan nga awan ti nadangran iti pannakauram ti atep iti nasao a paglakoan.
Kabayatanna, agtultuloy pay laeng ti imbestigasion dagiti otoridad no ania ti namunganayan ti uram ken mano ti balor ti nadadael gapu iti uram.
