LAOAG CITY – Maysa a lego piece a naipagarup nga awan ti balorna ti nailako ti $18,000 wenno katukad ti P1 million.
Segun iti Goodwill thrift store worker a nakabiruk iti balitok a lego, simmangpet daytoy iti store manipud iti maysa a donation.
Nakaikabil daytoy iti daan a bag ti alahas ken idi kitaenna ket saanna nga inpagarup nga adda ti balor daytoy.
Inlakoda daytoy iti online store-da iti balor a $14.95 wenno katukad ti P828.
Naammirisda laeng a dakkel ti value daytoy idi adda ti nag-message kadakuada a mangibagbaga a sitatallugodda a gatangen daytoy iti gatad nga $1000.
Nagsukisok iti online dagiti staff ti Goodwill ken naammoanda a “Kanohi Hau” ti awag iti lego piece daytoy.
Naisangsangayan daytoy para kadagiti Lego collectors gapu ta addaan ti 30 a pedaso daytoy iti intero a lubong.
Pina-auction daytoy ti Goodwill ken nailako daytoy iti agbalor nga $18,100 iti maysa nga anonymous collector.
Daytoy ket nabirngasan a “Most Expensive Lego Piece Ever Sold.”
