LAOAG CITY – Iti tawenna a 92, saan pay a nagpaudi ni Antonio Rao iti panagtaray. Ita a tawen, naminsan manen a linippas ti Italyano a lolo ti Rome Marathon iti uneg ti innem nga oras ken 44 a minuto.
Sipod idi ubing pay laeng daytoy, mahilig nga agtartarayen ni Rao. Agtawen ti 10 pay laeng isuna idi naglibas iti pagtaenganda idiay Calabria nga agturong idiay Rome.
Iti uneg ti tallo a dekada, awan ti liwayna uray naminsan a daras iti prestihioso a Rome Marathon, pammaneknek a ti tawen ket saan a lapped iti arapaap.
Iti kada lawas, ager-ersisio ni Rao, tartarayenna ti 20 agingga iti 30 a kilometro kas panagsagsagana iti sumaruno a marathon.
Idi 2023, kinigtotna ti lubong idi nakagun-od ti world record iti tawenna a 90 kalpasan a nalpasna ti marathon iti uneg ti innem nga oras ken 14 a minuto.
Nupay kasta, inadmitirna nga adda ti rikriknaenna ngem saan daytoy a nagbalin lapped kenkuana.
Para ken ni Rao, ti panagtaray ket saan laeng nga sports no di ket biagna daytoyen. Agtultuloy ti panangallukoyna kadagiti amin a magna ken agtaray.
Iti tawenna, isuna ti pammaneknek a basta adda ti determinasion ket awan ti imposible a gun-oden.
