LAOAG CITY – Maysa nga eroplano idiay China ti na-delay ti flight kalpasan a pinurwakan ti maysa kadagiti pasahero ti barya ti engine daytoy.
Iti official online account ti China Southern Airlines, kinumpirmaran ti airline a ti 10:00 a.m. flight-da manipud Sanya nga agturong idiay Beijing ket na-delay gapu iti pammati ti maysa kadagiti pasahero daytoy.
Mabuya iti maysa a footage nga inruar ti nagduduma a news agencies iti China a kukuestionaren ti maysa a cabin crew ti saanen a nainaganan a pasahero no apay pinurwakanna ti barya ti makina ti eroplano.
Basar iti pasahero, nangipurwak daytoy ti barya gapu ta mamati a nagasat daytoy.
Nupay kasta, saan a nagbalin a nagasat dagiti adda iti flight idi ma-delay ti uppat nga oras ti panagtalaw ti eroplano gapu ta dimmalan daytoy ti safety inspection.
Idi inspeksionen ti maintenance crew ti engine, nakita dagiti barya nga inpurwak ti pasahero. Kalpasan ti safety inspection, nag-takeoff ti eroplano ti 2:16 pm.
Naammoan nga awan ti rakurak pay ti China Southern Airline no ania a pannusa ti naipataw iti pasahero, nagballaagda kadagiti agbalin a pasahero iti airline-da a saanda a tuladen ken mapatawanda ti pannusa kasta pay a pagbaydadenda ti multa no asinoman ti mangipurwak ti barya iti engine kadagiti eroplanoda.
Ti makina ti China Southern Airlines a pinurwakan ti barya ti pasahero iti pammati a nagasat daytoy.
