LAOAG CITY – Naipilan ti kaso a panaglabsing iti Republic Act 10591 wenno Comprehensive Firearms and Ammunition. Regulation Act babaen iti inquest proceedings kontra ken ni Mr. Gilbert Castillo, agtawen ti 42, residente iti Barangay 19, Sto. Tomas iti ili ti Sarrat.
Daytoy ti inbatad ni Police Capt. Kester Arellano, ti chief of police iti ili ti Sarrat.
Segun ken ni Arellano, adda dagiti naawat da a report a ni
Gilbert Castillo ken ti kabsat na a ni Ciriaco Castillo Jr., agtawen ti 45 ket agbitbitbit ken agpap-paputok da ti paltog tunggal makainom dagitoy.
Inlawlawag ni Arellano nga awan kadagiti karruba dagiti agkabsat a Castillo ti nakaitured a nagreport kadakuada gapu ta maipagarop a kabutbuteng da dagitoy.
Nupay kasta, kuna na nga adda dagiti tumultulong kadakuada a nakaibaga mainaig iti ar-aramiden dagiti agkabsat isut gapuna a nagaplikar da ti search warrant kontra kadagitoy.
Innayon na nga iti panangiserbi da ti search warrant kadagiti agkabsat a Castillo ket nagnegatibo kenni Ciriaco idinto a positibo ni Gilbert.
Nakumpiskar da manipod iti annex ti pagtaengan ni Gilbert ti 15 a bala ti kalibre 45 a paltog; 3 a bala ti 5.56 ken dua a paltog.
Immunan nga inpetteng ni Gilbert a saanna a bagi dagiti nakumpiskar nga ebidensya kontra kenkuana ken ti patien na a rason no apay a naiserbian ti search warrant ket atapen na nga adda dagiti umapal gapu ta in-inot a rimmang-ay ti panagbiag da.
Ni Gilbert Castillo ket addan ti immuna a kaso nga homicide ken nabalud iti nasurok a 10 a tawen.
