LAOAG CITY – Inbilin ti China dagiti airline daytoy a saan pay laeng nga ag-order ti nayon a Boeing jets kas sungbat iti baro a 145% a taripa nga inpataw ti Estados Unidos kadagiti produkto nga aggapu idiay China.
Basar kadagiti report, naapektaran daytoy ti plano a panangipatulod kadagiti dinos-dosena nga eroplano kadagiti kangrunaan nga airline ti China kas ti Air China, China Eastern ken China Southern manipud idi 2025 agingga iti 2027. Naipadamag nga inpasardeng ti Beijing ti panaggatang kadagiti piyesa ti eroplano manipud idiay Estados Unidos.
Naammoan nga uray saan pay a kumpirmado no adda ti opisial a mangipawil kadagiti aircraft parts ngem madanagan dagiti analyst gapu iti posible nga agbalin nga epekto daytoy iti programa a C919 ti China a mangnamnama kadagiti parts nga aggapu idiay Amerika.
Naammoan nga uray limitado ti alisto nga epekto iti Boeing ket mabalin nga iyakar ti eroplano iti sabali nga airline.
Kabayatanna, mapatta-patta a dumanon iti $650 bilyon ti gatad dagiti produkto a naapektaran iti nagbaetan ti dua a pagilian sipod idi 2024 a posible a mangitunda ti nabaybayag a pannakaitantan iti industria ti aerospace.
