LAOAG CITY – Inrakurak ni P/Lt.Col. Jephre Taccad, ti mangidadaulo ti Provincial Operation Management Unit iti Ilocos Norte Police Provincial Office nga adda ti innem a lugar ditoy probinsia a posible a nabara inton eleksion.
Segun kenkuana, dagiti nasao a lugar ket pakairamanan iti ili ti Badoc, Paoay, Solsona, Pasuquin, Pagudpud ken iti siudad ti Batac.
Inbatadna nga adda dagiti Quick Reaction Team a mangbantay kadagiti nadakamat a lugar tapno mapagtalinaed ti linak, urnos ken talna kabayatan ti eleksion.
Inlawlawagna nga adda dagiti productive measure nga ipatungpalda tapno malappedan ken maliklikan dagiti saan a napintas a mapasamak.
Mainaig iti daytoy, inpakaammo ni P/Col. Frederick Obar, Provincial Director ti Ilocos Norte Police Provincial Office nga adda dagiti binulodda a patrol car a naidesignar iti ili ti Pagudpud, Bangui, Badoc, Solsona ken ditoy siudad ti Laoag.
Inpasingkedna a patas ti ipapaayda a seguridad kadagiti amin a kandidato a nagpaidasig kadagiti nagduduma a posision ti gobierno.
Kabayatanna, kiniddaw ni Obar ti panagkaykaysa dagiti amin a kandidato para iti nakappia nga eleksion.
