LAOAG CITY – Naisublin ti leave credits dagiti Day Care Workers ditoy siudad ti Laoag.
Daytoy ket kalpasan a pinatgan ti lokal a gobierno ditoy siudad ti Laoag ti kiddaw dagiti 54 a Day Care Workers ditoy siudad a maisubli ti leave credits dagitoy.
Segun iti lokal a gobierno, daytoy nga addang ket mangipakita iti panangaprisiar kadakuada iti oras ken sakripisio mga ipapaay dagitoy kadagiti 92 a day care center ditoy siudad ti Laoag.
Ti pannakaisubli ti leave credits ket tapno maikkanda ti gundaway nga agbakasion wenno makainana babaen ti vacation leave.
Mainaig iti daytoy, no bilang nagsakitda wenno saan a nasayaat ti marikriknada ket saanda a kabaelan ti mapan mangisuro ket mabalinda a gundawayan ti sick leave.
Naammoan nga asinoman ti mangusar ti vacation wenno sick leave ket adda latta maawatda a sueldoda ngem nasken a suruten laeng dagiti naiyataday a pagalagadan.
Ti leave credits ket isu ti pribilehio ti maysa nga empleado a maaddaan ti vacation ken sick leave.
Kabayatanna, basar kadagiti sumagmamano a Day Care Workers, naikkat ti pribilehioda kadaytoy a banag sipod idi 1995 iti saan a masinunuo a rason.
