LAOAG CITY – Nangipatulod ti European Union (EU) ti agarop 200 nga observers para iti mapaspasangasangan nga eleksyon a maiyuswat intono Mayo 12 ita a tawen.
Segun iti European Union Election Observation Mission nga idaulwan ni chief observer Marta Temido, ti mandato da ket tapno i-assess ti proseso ti eleksyon iti Pilipinas ken no sursuruten na ti konstitusyon ti pagilian ken iti international standards.
Immunan a naipatulod ti pakabuklan a 72 nga observers idinto a naituding a sumangpet iti pagilian ti nayun a nasurok a 100 pay nga observers kadagiti sumarsaruno a lawas.
Inpetteng ni Temido a saan da laeng nga adda ditoy Pilipinas tapno tingitingen dagiti resulta ti eleksyon wenno tapno agbalin a legal ti proseso no di ket tapno obserbaran ken i-assess no resrespetaren wenno saan ti international standards, Konstitusyon ti Pilipinas ken dagiti paglintegan dagitoy.
Naka-schedule met ti panangiparuk-at ti European Union observers ti assessment da kadagiti sumarsaruno a bolan no sadinno mangipaay da kadagiti suhestiyon no kasanu nga ad-adda a mapasayat ti waras ti panangiwayat ti eleksyon iti Pilipinas.
Inbatad met ni Deputy Chief Observer Manuel Sanchez De Nogues, i-assess da pay dagiti kandidato iti eleksyon, voter registration ken analisaren dagiti reklamo nga inpila ti Commission on Elections ken resolutions.
