LAOAG CITY – Nabagkong ti maysa a tricycle driver nga agur-uray laeng ti pasaherona iti San Nicolas Public Market iti Barangay 3 iti ili ti San Nicolas.
Segun ken ni P/Capt. Randy Damo, Hepe ti San Nicolas Municipal Police Station, nabigbig ti biktima a ni Eric Bagay, agtawen ti 45 ken residente ti Barangay 19 iti ili ti San Nicolas idinto a nabigbig met ti suspek a padana met laeng a tricycle driver a ni Richard Mamuad, agtawen ti 50 ken residente ti Barangay 9 iti nasao met laeng nga ili.
Inbatadna a basar iti inwayatda nga imbestigasion, kabayatan nga agur-uray ti biktima kadagiti pasaherona ket kellaat a binagkong ti suspek ti biktima iti paset ti siketna.
Gapu iti daytoy, kunana nga insigida met a naitaray iti kaasitgan nga ospital ti biktima para iti naan-anay a pannakatamingna.
Inlawlawagna nga imon ti rumrummuar a rason iti napasamak a pammagkong no sadinno a maipagarup a kursunada ti biktima ti dati nga asawa ti suspek.
Naammoan a nabayagen a nagsina ti suspek ken ti asawana iti saan pay a masinunuo a rason.
Innayonna a mapilaan ti suspek iti kaso a frustrated murder ken nagtalinaed iti pagbaludan.
