LAOAG CITY – Nakasangpeten idiay China ti national women’s futsal team ti pagilian a “Filipinas.”
Makilaban ti national team iti 2025 AFC Womens’ Futsal Asian Cup a maisayangkat idiay Hohhot, China manipud inton Mayo 6 agingga iti 18.
Kagiddan iti daytoy, inrubuat ti Philippine Football Federation (PFF) ti opisial a nagan ti futsal team ti pagilian a “FILIPINA5” idinto a ti men’s futsal team ket agtalinaed iti Philippine Men’s National Futsal Team.
Idauloan ni Spanish head coach Rafa Merino Rodrigo ti 15 a miembro ti “Filipina5.”
Iti agdama, adda iti ranked 55 iti intero a lubong ti womens futsal team no sadinno a karamanda iti Group B kaduada ti world number 9 nga Iran, Number 11 a Vietnam ken world number 29 nga Hong Kong.
Naammoan a ti Iran ket nagbalinen a kampeon ti AFC idi 2015 ken 2018 idinto nga iti agdama a kampeon ti Southeast Asian ket ti Vietnam.
Kabayatanna, umuna a makalaban ti FILIPINA5 ket ti Iran inton Mayo 7 ti alas-11 ti bigat idinto a ti sumaruno a makalaban ti Vietnam inton Mayo 9 ken ti Hong Kong met inton Mayo 11.
