LAOAG CITY – Ginutigot ti Estados Unidos ti India ken Pakistan nga agtinnulong da nga agtrabaho tapno saan a kumaro ti tensyon kalpasan ti nadara a panagraot iti Indian-administered Kashmir a nakatayan ti 26 a sibilyan iti napalabas a lawas.
Inaramid daytoy ni US Secretary of State Marco Rubio kalpasan iti pannakisarita na babaen iti telepono iti Indian foreign minister ken Pakistan prime minister tapno mapagtalinaed ti kapya ken seguridad iti South Asia.
Maipalagip nga ak-akusaran ti India ti Pakistan a mangsupsuporta kadagiti militants a dagitoy ti adda iti likudan ti napasamak a panagatake iti maysa a resort iti ili ti Pahalgam, ngem naglikudan daytoy ti Islamabad.
Gapu iti napasamak a panagatake ket pinaserraan ti India ti airspace da para iti amin a Pakistani aircraft.
Kabayatanna, iti pannakisarita ti top US diplomat ken ni Pakistani Prime Minister Shehbaz Sharif ket inpetteng na a kasapulan a kondenaren ti napasamak a panagatake.
Ginutigot na pay ti Islamabad a makikooperar iti pannakaimbestigar ti nasao a panagatake.
