LAOAG CITY – Inpasigurado da Governor Matthew Marcos-Manotoc ken Congressman Sandro Marcos a nagtalinaed ti napintas a langen-langen da iti baet ti mapaspasamak iti nagbaetan dagiti nagannak da a Senador Imee Marcos ken Presidente Ferdinand Marcos Jr.
Inbatad ni Manotoc nga ipadpadas da ti agbalin a rangtay tapno maurnus ti aniaman a saan a pagkinnaawatan dagiti agkabsat a Marcos.
Nupay kasta, kuna na a no aniaman ti saanda a pagkinnaawatan ket saan nga isuda ti rumbeng a pagdamagan no di ket mismo metlaeng a da Senador Imee ken Presidente Marcos.
Mainaig iti daytoy, inpakaammo ni Congressman Marcos a kanayun da nga agsarsarita nga agkasinsin maipanggep iti nagduduma a banag.
Innayon na a nakatutuk da kadagiti rumbeng nga aramiden da ditoy probinsya, aglalo ita ta napasubli dan ti ciudad ti Laoag kalpasan a nangabak iti kina-mayor ti sinuportaran da a ni Konsehal Bryan Alcid.
Kabayatanna, kuna ni Marcos nga aramiden da ti kabaelan da tapno matungpal da amin dagiti inkarida kabayatan ti kampanya.
