LAOAG CITY – Kinondenar ti naruay a lider ti pagilian ti napasamak a pammaltog ken panangpatay iti dua nga staff ti Israel Embassy idiay Washington.
Addan iti ruar dagiti biktima nga agkarelasion nga isuda Sarah Lynn Milgrim ken Yaron Lischinsky kalpasan a nagatendar ti maysa nga aktibidad iti Capital Jewish Museum idiay Washington DC idi pinaltu-paltoganda dagitoy.
Naarestar ti suspek a ni Elias Rodriguez, agtawen ti 30 manipud idiay Chicago kalpasan ti insidente.
Inbatad ni United States President Donald Trump a napalos ti panagladingitna iti napasamak no sadinno a nangidanon daytoy ti pannakipagladingitna kadagiti pamilia dagiti biktima.
Gapu iti insidente, pinaigetan ni Israel Prime Minister dagiti security kadagiti embahadada kadagiti nagduduma a paset ti lubong.
Inpasigurado ni Attorney General Pam Bondi a pagsungbatenna iti linteg ti nasao a suspek.
Naruay a pagilian iti panangidaulo ti European Union ti nangkondenar iti insidente.
Kalikagum dagitoy a mapagsungbat ti suspek iti inaramidna.
Maipalagip nga inasitgan ti suspek ti grupo dagiti tattao iti ruar ti Capital Jewish Museum ken pinaltu-paltoganna ti dua a biktima a nagpukkaw pay ti “Free Palestine.”
