LAOAG CITY – Inrakurak ti Presidente ti Iran a ni Masoud Pezeshkian nga addan iti gubat wenno “full-scale war” ti pagilianda kontra iti Estados Unidos kagiddan ti baro manen nga airstrikes ti Washington kadagiti nagduduma a paset ti Iran.
Inbatad ni Pezeshkian a kasapulan nga awaten ti Iran ti agbalin nga epekto ti agtultuloy daytoy a panangatake kabayatan a kumarkaro ti tension iti nagbaetan ti dua a pagilian.
Inrakurak ti Iranian state media a nangiwayat ti Estados Unidos dagiti baro a panangraot iti amianan ken tengnga a paset ti Iran pakairamanan ti Bushehr no sadinno a masarakan ti kakaisuna nga operational civilian nuclear power plant ti pagilian.
Iti nagsina a rakurak, inbatad ti Islamic Revolutionary Guard Corps a nangiwayat met ti Iran dagiti panangatake kadagiti target iti Bahrain, Jordan ken Syria kas sungbat kadagiti tignay ti Estados Unidos.
Nairekord ti pannakatay ti maysa nga indibidual ken pannakasugat ti sumagmamano pay iti East Azerbaijan province kalpasan a natamaan ti missile strike.
Kabayatanna, iti baet ti agtultuloy ti rinnupak, kuna ti Iranian Foreign Ministry nga agtultuloy latta ti diplomatiko a pannakikammayet ti Estados Unidos iti babaen kadagiti international mediator tapno maliklikan ti nalawlawa ken nakarkaro a rinnupak iti rehion.
