LAOAG CITY – Manamnama a maipasdek ditoy siudad ti Laoag ti 50 nga ektaria nga urban park a maibilang a maysa kadagiti kadakkelan a parke iti intero a pagilian.
Maidasig daytoy iti New York’s iconic Central Park nga addaan ti kalawa a 341 nga ektaria no sadinno nga agarup 1/7 iti daytoy ti kalawa ti nasao nga urban park.
Naammoan a ti maplanplano nga urban park ket nadakdakkel ngem iti La Mesa Eco Park nga addaan ti 33 nga ektaria ken Quezon Memorial Circle nga addaan ti 27 nga ektaria ken dandani a kadakkelna ti Rizal wenno Luneta Park nga addaan ti kalawa a 58 nga ektaria.
Mainaig iti daytoy, inbatad ni Sangguniang Panlungsod Member Atty. Jason Perera, ti multi-functional park ket pakairamanan ti outdoor sports facilities, trails, open fields ken public plaza.
Daytoy ket nadisenio tapno itantudo iti benneg ti salun-at, host events ken suportaran ti aglawlaw kagiddan ti pannakaidiaya ti natalged a lugar para kadagiti residente pakairamanan dagiti senior citizens ken Person’s With Disability.
Kabayatanna, ti nasao a parke ket masarakan iti Barangay 27 ken Barangay 28 ditoy siudad ti Laoag.
