LAOAG CITY – Manamnama a mapadayawan ken maipaayan ti insentibo dagiti sumagmamano a tricycle drivers a nangidiaya ti libreng sakay kadagiti atleta ken delegado ti Palarong Pambansa 2025 manipud iti gobierno probinsial.
Segun ken ni Gov. Matthew Marcos Manotoc, babaen iti daytoy a wagas ket mabigbig ti sakripisio ken nasayaat a panagpuspuso dagiti maseknan a tricycle drivers.
Inbatadna a nangisayangkat man wenno saan dagiti tricycle drivers ti libreng sakay ket agtultuloy latta ti panangipaay ti tulong kadakuada.
Kabayatanna, inpakaammo ni Gov. Manotoc a maipangpangruna pay ti panangipaay ti gobierno probinsial ti insentibo para kadagiti atleta manipud ditoy probinsia a nakagun-od ti balitok a medalya iti Palarong Pambansa 2025.
Maipalagip nga adda dagiti sumagmamano a tricycle drivers manipud iti siudad ti Batac, iti ili ti San Nicolas ken dadduma pay ti nangidiaya ti libreng sakay para kadagiti maseknan nga atleta ken delegado ti Palarong Pambansa 2025.
