LAOAG CITY – Naipaayan ti 160 a barangay manipod iti 559 a barangay ditoy probinsya iti Bajaj Maxima Cargo.
Indauloan a mismo ni Gob. Matthew Marcos Manotoc ti pannakaited dagiti nasao a lugan kadagiti maseknan a kakapitan kalpasan a nabendisyonan dagitoy.
Inimatangan ni Bise Gob. Cecilia Araneta Marcos a sumaruno a gobernador pakairamanan da ABC Federated Pres. Ryan John Pascua ken dagiti opisial manipud iti sumagmamano a Local Government Units ti probinsia a pakaibilangan dagiti nabutusan a sumaruno a mayor ti siudad ti Batac a ni Sang. Panglungsud Member Markee Chua ken ti sumaruno a mayor ti ili a Badoc a ni ABC Pres. Virgilio Calajate ti pannakaibunong dagiti nadakamat a lugan.
Mainaig iti daytoy, inpakaammo ti ABC Federated President a kiniddaw na a dagus iti gobernador a maipaayan amin a barangay ditoy probinsia iti nasao a lugan.
Inbatadna nga inpasigurado ni Gob. Manotoc ti panagkiddawna iti sumaruno a gobernador ngem masapol a mangbiruk ti probinsya ti pondo a maigatang kadagiti nasao a lugan a maipaay kadagiti dadduma pay a barangay.
Inlawlawag ni Pascua a dagiti naipaayan iti lugan ket kiniddaw dagiti barangay officials itay kallabes.
Innayonna a malaksid kadagiti naibunong a lugan ket adda pay dagiti naipaay a 20 a mono block chairs ken tents kadagiti amin a barangay.
Immunan nga adda dagiti naibunong a medical equipment kadagiti amin a barangay ditoy probinsia.
