LAOAG CITY – Inpakaammo ni PBGen Lou Evangelista, Regional Director ti Police Regional Office 1 a dumanonen iti sumurok walo a bilyon a pisos ti balor ti floating shabu a nakita iti paset ti Zambales ken ditoy Ilocos Region nga adda ti pakabuklan a sumurok maysa a ribu a kilo.
Insuko dagiti concerned citizen ken dua a mangngalap ti agarup 20.4 milyon a pisos a balor ti maatap a shabu nga agtatapaw iti kabaybayan ditoy probinsia.
Naammoan a dagiti maipagarup a shabu a naikabil kadagiti tallo a pakete nga addaan ti Chinese character markings nga agdagsen ti agarup tallo a kilo.
Nakita dagitoy nga agtatapaw iti kabaybayan iti paset ti Barangay Pangil iti ili ti Currimao; Barangay 33-A, La Paz ditoy siudad ti Laoag ken Barangay Masintoc iti ili ti Paoay.
Naammoan nga amin a pakete ti shabu ket naisuko kadagiti kameng ti Philippine Drug Enforcement Agency (PDEA) Ilocos Norte Provincial Office ken local counterparts manipud iti Philippine Coast Guard (PCG) ken Philippine National Police (PNP) babaen kadagiti sumagmamano a residente iti Zambales, Ilocos Norte, Ilocos Sur ken Pangasinan.
Mainaig iti daytoy, inbatad ni PBGen Evangelista nga adda ti 69 a mangngalap ti maipaayan ti pammigbig ken maikkan ti insentibo gapu iti panangisukoda kadagiti kontrabando kadagiti otoridad.
Kabayatanna, adda manen ti maysa pay a pakete ti nakita iti ili ti Pagudpud a naglaon ti maatap a shabu.
