LAOAG CITY – Inpaganetget ti Iran a saan daytoy a makisarita mainaig iti baro a nuclear talks agingga nga agtultuloy ti panangatake ti Israel kadakuada.
Inaramid ti Iran ti rakurak kalpasan a nagballaag ti Israeli Defense Minister iti napaut a riribuk iti Islamic Republic.
Immunan a kiniddaw ni Iran Foreign Minister Abbas Araghchi iti pannakitaripnongna iti European diplomats iti Geneva a maminsan manen nga isubli ti panangikagumaan iti Amerika mainaig iti nuclear programme ti pagilianda.
Inbatad ti Iranian official a nakasaganada nga ikonsiderar ti maaddaan ti diplomasia iti oras laeng nga agsardengen ti agresyon ti Israel.
Inpetteng ti opisial ti Iran a nakappia ti nuclear programme-da ken dagiti panangatake ti Israel a aipagarup a naglabsing iti international law.
Gapu iti daytoy, itultuloy ti Iran ti pannakaipatungpal ti lehitimo a karebbenganda iti panangdepensa iti bagida ket saan a negotiable ti defense capabilities ti Iran.
Kabayatanna, iti baet ti agtultuloy a gubat iti nagbaetan ti Israel ken Iran, inrakurak ti human rights group a dumanonen iti agarup 639 ti bilang dagiti natay idi Huebes.
