LAOAG CITY – Inpakaammo ni Atty. Charito Malicad, mangidadaulo ti City Tourism Office a manarimaan a maplanplano ti Tourism Itinerary Route ditoy siudad ti Laoag.
Nupay kasta, inadmitirna a saan a kaskarina ti pannakabukel ti Tourism Itinerary Route gapu ta kasapulan ti naan-anay a pannakaadal daytoy tapno makita dagiti lugar a mabalin a pagpasiaran dagiti turista wenno gangannaet.
Inbatadna a masapul pay a maiplastar a naimbag dagiti tourist destination a pagturongan dagiti agpasiar ditoy siudad ti Laoag tapno ad-adda magutigot dagitoy nga agsubli.
Innayonna a makikoordinarda kadagiti maseknan nga indibidual wenno opisina tapno agbalin a napintas ti resulta ti pannakaaramid ti Tourism Itinerary Route ditoy siudad ti Laoag.
