LAOAG CITY – Nagtalinaed nga awan iti supply ti kuryente ti dua a balay iti Barangay Paratong iti ili ti Paoay kalpasan a dinungpar ti maysa a fuel tanker truck iti poste ti kuryente iti nadakamat a lugar.
Segun iti pahinante a nagpabigbig laeng iti nagan a “Runell”, naggapo da iti Meycauayan, Bulacan ken mapan da koma agdeliver iti Barangay Sta. Maria iti ili ti Vintar idi napukawan ti preno ti nagluganan da.
Inlawlawag na a kabayatan ti kaadda da iti Candon, Ilocos Sur ket nadlaw da nga adda ti panagpalyar ti tanker ngem intultuloy da latta ti nagbiyahe.
Nupay kasta, kunana nga idi nakadanun da iti ili ti Paoay ket ditoyen a napukawan ti preno ti nagluganan da a fuel tanker truck.
Gapu iti daytoy, napanunot ti driver nga idungpar iti kayo ti marunggay ngem gapu iti kapigsa ti impact ti pannakadungpar na ket nagderetso iti poste ti kuryente.
Insigida met a nagturong dagiti kameng ti Ilocos Norte Electric Cooperative iti lugar tapno iplastar ti nadungpar a poste ngem gapu ta nadadael ti kuntador ti dua a balay ket nagtalinaed nga awan ti kuryente da.
Mainaig iti daytoy, iti baet ti nagbalin a perdisyon ti sango ti fuel tanker truck iti pannakaidungpar na ket saan a naan-ano ti driver ken pahinante.
