Inpakaammo ni Engr. Glen Miguel, District Engineer ti Department of Public Works and Highways – First District Engineering Office a mabalbaliwan ti pannakailatang ti pundo para iti pannakaestablisar ti solar street lights iti airport road ditoy siudad ti Laoag.
Inbatadna nga inpagarupna ket maiparuk-at ti nasao a pundo idi tawen 2024 ngem saan daytoy a natungpal.
Gapu iti daytoy, inlawlawagna a saanda a narugianan ti pannakaipatungpal ti pannakaestablisar ti solar street lights iti airport road ditoy siudad.
Kunana nga ikarigatanda a maminsan manen a mailungalong ti pundo ti proyekto tapno insigida a marugianen daytoy iti kabiitan a panawen.
Innayonna a mangnamnama ti opisinada a mairuar ti pundo ita a tawen 2025 tapno ad-adda a rumaniag dagiti kalsada iti paset ti airport road ditoy siudad ti Laoag.
