LAOAG CITY – Inbatad ni Engr. Geffrey B. Catulin, Manager ti National Irrigation Administration, Region 1 a kas panagsagsagana ti ahensiada iti manamnama nga epekto ti El Niño ket manarimaan ti panangkitada kadagiti suplay ti danum kadagiti dam.
Kinunana a managiwaywayatda ti timely monitoring kadagiti dam ditoy rehiyon uno a pagalalan dagiti padanum kadagiti kataltalunan.
Malaksid iti panang-monitor kadagiti dam, karaman pay iti panagtignay ti ahensia dagiti coordination meeting kadagiti nagduduma a lokal a gobierno ken iti Department of Agriculture.
Impakaamona ti panangipromote-da iti crop diversification para kadagiti adayo a service area a narigat a padanoman ket gugutigotenda dagiti mannalon kadagti nasao a lugar a saan pay laeng nga agmula ti pagay ken dagiti diversified crops a kasapolan ti adu a padanum.
Innayonna pay ti pannakaimplementar ti rotational water distribution kadagiti lateral canals.
Impannakelna ti panangisuro ti NIA ti alternate wetting and drying technology kadagti mannalon no sadinno a kanayon a maipalpalagip kadakuada nga uray adda pay laeng iti vegetative stage dagiti mula ket saan pay laeng a masapol ti ado a padanom.
Kinunana a masapol laeng dagiti mula a pagay ti adu a padanom no madanonanen ti flowering stage.
Mainaig iti manamnama a mapasaran ti pagilian a nakaro a pudot ti panawen, impasiguradona ti proyekto a pannakaipaay dagiti solar pumps kadagiti nangangato a lugar a narigat a maabot ti ayus ti danum.
Kabayatanna, kiddaw ni Catulin ti panagtitinnulong dagiti mannalon, irrigators association ken ti ahensia mainaig iti manamnama a super El Niño.
Impasigurado ni Engr. Catulin a silulukat ti opisina ti National Irrigation Administration iti nagduduma a probinsia ditoy rehiyon uno kadagiti aniaman a kiddawen dagiti mannalon mainaig kadagiti abiso, panagplano a nasapa ken dagiti ramit a kasapulan dagiti mannalon tapno maliklikan ti saan a mapakpakadaan a nakaro nga epekto ti El Niño.
