LAOAG CITY – Kalikagum ni Sangguniang Panlungsod Member Jaybee Baquiran ti pannaka-regulate dagiti maestablisar a gasoline station ditoy siudad ti Laoag.
Daytoy ket kalpasan a naobserbaranna nga adda ti gasoline station a naipatakder iti paset ti Bacarra Road kangrunaanna iti asideg ti Divine Word College of Laoag.
Inbatadna nga uray saan pay a nangrugi ti operasionna daytoy a gasoline station ket masapul koma a makita ken ma-regulate sakbay a mapalubusan dagitoy a mangrugi ti panagoperarda.
Inlawlawagna a makaalarma ti pannakaipasdekna ti nasao a gasoline station gapu ta asideg daytoy iti pagadalan.
Kabayatanna, nairekomendar ti panangimbestigar ti Commitee on Trade and Industry ken ti Committee on Laws maipanggep iti daytoy a banag.
