LAOAG CITY – Natay ti 78 nga indibidual pakairamanan ti agarup 28 nga ubbing gapu iti nakaro a layos idiay Texas, United States of America.
Inbatad ni Texas Governor Greg Abbott nga adda ti 41 nga indibidual ti mapukpukaw pakairamanan ti 10 a babbai a mapapati a naiyanod manipud iti riverside summer camp dagitoy.
Mainaig iti daytoy, kuna ni Kerr Sheriff Larry Leitha nga agtultuloy ti naiget a pannakaisayangkat ti search and rescue operation tapno insigida a mabirukan dagiti mapukpukaw agpapan kadagitoy a gundaway.
Mangnamnama ni United States President Donald Trump a makabisita daytoy idiay Texas inton Biernes tapno personal a maimatangan ti kasasaad dagiti naapektaran iti nakaro a layos.
Maipalagip nga adu a tattao ti matmaturog idi ngimmato ti danum iti Guadalupe River a dimmanon iti 26 a kadapan iti uneg laeng ti nakurkurang ngem maysa nga oras.
Immuna iti daytoy, ad-adda a naapektaran ti nakaro a layos ket dagiti mobile homes, summer camps ken camping sites no sadinno a naruay dagiti naguummong para iti holiday celebrations idi Hulio 4.
