LAOAG CITY – Nagtalinaed a mapukpukaw ti 161 nga indibidual ken 109 ti nakumpirmaran a natay gapu iti nakaro a layos idiay Texas, United States of America.
Basar kadagiti otoridad, immadu dagiti mangiwaywayat ti naig-iget a search and rescue operation iti maikalima nga aldaw a panangbiruk kadagiti mapukpukaw a mabalin a manayonan pay ti bilang dagitoy.
Mainaig iti daytoy, nakumpirmaran nga adda ti 27 a babbai ken staff ti karaman kadagiti pimmusay idinto a lima nga ubbing ken maysa a counsellor ti mapukpukaw iti Camp Mystic a maysa a girls’ summer camp iti lugar.
Naammoan a nababalaw ti pannakaiparuk-at ti flood warnings iti lugar.
Kabayatanna, inrakurak ni United States President Donald Trump a bumisita daytoy kadagiti naapektaran a lugar kaduana ti first lady inton Biernes.
