LAOAG CITY – Natay ti maysa a lalaki kalpasan a nagaburan iti daga kabayatan iti panagkalina ti bubon iti Barangay 33-B Lapaz ditoy siudad ti Laoag.
Nabigbig ti biktima a ni Jesus Pascual, agtawen ti 59, ken residente metlaeng iti nadakamat a barangay.
Immunan nga inbatad ni Mr. Toribio Pascual Jr., kabsat ti biktima, manarimaan ti panagkali ti kabsatna ti bubon idi a kellaat a nagreggaay ti daga a nangitunda ti pannakagabur daytoy.
Inbatadna nga adda ti maysa a lusob ti naikabilen sakbay a napasamak nga insidente gapu ta limmukneng ti daga.
Gapu iti daytoy, kunana a nagtataray dagiti kakadua ti biktima a napan nagkiddaw ti tulong.
Innayonna nga awan ti safety gears nga inusar ti kabsatna kabayatan ti panagkalida ti bubon.
Mainaig iti daytoy, insigida met a nagturong dagiti kameng ti Philippine National Police, Philippine Coastguard, Bureau of Fire Protection, City Health Office, City Disaster Risk Reduction and Management Council iti panangidaulo ni Dr. Melvin Manuel ken dadduma pay.
Inlawlawag ni Dr. Melvin Manuel a nasurok a 20 a kadapan ti kauneg ti maar-aramid a bubon ken immabot iti agarop 2 nga oras sakbay a naiyaon ti biktima.
Kuna na pay a narigatan dagiti rescuers a nangiyaon iti biktima uray nagusar da ti backhoe gapu ta nalukneng ti daga ken alisto nga agrubnay.
Innayon ni Dr. Manuel nga idi naiyaon ti bagi ti biktima ket inpadas da paylaeng nga isalakan ti biagna ngem gapu iti nakaro a pannaka-suffocate na iti uneg ti daga ket indeklarar ti City Health Officer ditoy ciudad a ni Dr. Rodrigo Catcatan a pimmusayen.
Gapu iti daytoy, inbalakad ni Manuel kadagiti agar-aramid ti bubon a saan paylaeng nga agkali ti daga no agtudtudo gapu ta nalukneng ti daga ken dakkel ti posibilidad na a marubnay a mabalin a pakagaburan da.
Kabayatanna, agpapan ita ket saan pay a nangipaay ti reaksyon wenno komento ti akinbagi ti maar-aramid a bubon.
