LAOAG CITY – Inawagan a peke ken nakababain ti agwarwaras nga alegasyon kontra ken ni First Lady Liza Araneta Marcos mainaig iti pannakatay ti negosyante a ni Paolo Tantoco.
Segun ken ni Under-Secretary Claire Castro, us-usaren laeng ti sumagmamano nga obstructionist ti isyu tapno dadaelen ti 1st lady, karaman ni Presidente Ferdinand Marcos Jr., ken ti administrasyon.
Inpetteng ni Castro a nakaladladingit a mairamraman iti pulitika dagiti pribado nga indibidwal nga agladladingit.
Mainaig iti daytoy, kinondenar ti Palasyo ti maipagarop a peke a police report a naiwaras iti online no sadinno a rumrumuar a nanayunan laeng ti sumagmamano nga impormasyon.
Inawagan daytoy ni Castro a dakkel a kinaulbud ken inpaganetget na a siasinno man ket mabalin a mangiyuswat ti bukod a beripikasyon iti Beverly Hills Police Department tapno paneknekan a dagiti linya a nainayun ket saan a paset ti orihinal a dokumento.
Naiget pay a naglikudan ti Palasyo a paset ni Tantoco iti official entourage ti 1st lady iti biyahe na idiay Los Angeles.
Innayon ni Castro nga adda dagiti kameng ti US security service ken Presidential Security Group ti First Lady ken iti sabali nga hotel ti nagtalinaedan na saan nga iti nagyanan ni Tantoco.
